«Кеңқияқ-Құмкөл» мұнай құбырынан аса ірі мөлшерде мұнай ұрлаушылар ұсталды - ҚР ІІМ

АСТАНА. 11 қаңтар. ҚазАқпарат /Жасұлан Жолдыбаев/ - Қаңтар айының басында Қызылорда облысында аса ірі мөлшерде мұнай ұрлауды ұйымдастырған деген күдікпен бір топ адам құрықталды.

 Бұл туралы бүгін елордада ҚР ІІМ-нің ресми өкілі Нұрділдә Ораз мәлім етті.

 «Атап айтқанда, «Кеңқияқ-Құмкөл» мұнай құбырының 580 шақырымында жеке күзет агентігінің қызметкерлері  мұнай өнімдерін ұрламақшы болған 27-ден 56 жасқа дейінгі аралықтағы 8 адамнан тұратын топты, сондай-ақ мұнай таситын 6 «КамАЗ» автокөлігін ұстады, оның біреуі мұнайға толы болған», - дейді ресми өкіл. 

 Н. Ораздың айтуынша, ұсталғандардың барлығы қамауға алынды. Аталған қылмысқа қатысы бар басқа да тұлғаларды анықтау бойынша жедел-тергеу  шаралары қабылдануда.

 Жалпы өткен жылы мұнай ұрлаудың 95 фактісі анықталған. Оның ішінде 48 фактісі мұнай құбырына заңсыз қосылу. Материалдық шығын 27 миллион теңгені құрап отыр.