Қостанай ауруханасында жүкті әйел көз жұмды
Туыстарының айтуынша, қазан айының басында Оксана Гладкованың жағдайы жақсы болған. Жүктіліктің бесінші айы еш қиындықсыз өтіп жатқан. Алайда, 2 қазан күні Оксана өзін жайсыз сезініп, туыстары жедел жәрдем шақырған. Бірақ, туыстары жедел жәрдемнің 1 сағат өткен соң келгенін айтуда.
«Оксанаға дәрі ғана берді», - дейді әкесі. 3 қазан күні де дәл осы жағдай қайталанып, әйелдің жай-күйі нашарлаған.
«Дүйсенбі күні түнде жедел жәрдем оны алып кетті. Түнгі екіде алып кетіп, 12 сағат бойы бір ауруханадан екінші ауруханаға тасып жүрген», - деді Оксананың әкесі Владимир Чернов.
Оксана Гладкованы облыстық ауруханаға жатқызған. 4 қазан күні дәрігерлер іштегі баланың өлімін анықтаған және кесір тілігін жасап, әйелді жан сақтау бөліміне ауыстырған. 5 қазан күні Оксана Гладкова көз жұмған.
«Медициналық құжаттамаға, пациенттің қозғалу бағытына сараптама жүргізіліп жатыр, патологиялық-анатомиялық зерттеу жасалды. Гистологиялық зерттеудің деректерін күтудеміз. Тәуелсіз мамандардан және Денсаулық сақтау мен әлеуметтік даму министрлігі мамандарынан құралған екі комиссия қатар жұмыс істеп жатыр», - деді Қостанай облысы денсаулық сақтау басқармасы басшысының міндетін атқарушы Гүлшат Байжұманова.
Дәрігерлердің кінәсі жайлы пікір айтуға әлі ерте екенін атап өтті Г.Байжұманова.