Қостанай облысында жылқыларға оқ атқан барымташылар ұсталды

ҚОСТАНАЙ. 25 қазан. ҚазАқпарат - Қостанай облысының Меңдіқара АІІБ-нің қызметкерлері жылқыларға оқ атқан барымташыларды ұстады.

Ауыл тұрғындарына келтірілген жалпы шығынның көлемі 1 миллион 250 мың теңгені құрады, деп хабарлады Меңдіқара АІІБ бастығының орынбасары Бейбіт Қабдырахметов.

Бұл қылмысты жасады деген күдікпен 20-30 жас аралығындағы бес адам ұсталды. Олар жайылымдағы жылқыларға оқ атқан. Жылқылардың етін алыпсатарларға сатып, одан түскен ақшаны тең бөлісіп отырған.

Б.Қабдырахметовтің айтуынша, шұғыл жедел-іздестіру шаралары өткізіліп, тергеу-жедел топтары оқиға орнына жеткен. Ұсталған күдіктілер қылмыстарын мойындап, түсініктеме берді. Барымташылардың үшеуі қамауға алынды, қалғандары ешқайда кетпеу жөнінде қолхат толтырды. Қазіргі уақытта іс сотқа жіберілді.