Қостанайда жол жөндеуге 7 млрд теңге бөлінді

АСТАНА. ҚазАқпарат - Жыл соңына дейін Қостанай облысында 13 млрд. теңгеге автожолдарды жөндеу жұмыстарын жүргізу жоспарлануда. Бұл туралы ОКҚ баспасөз мәслихатында өңір әкімінің орынбасары Сергей Карплюк хабарлады, деп хабарлайды ҚазАқпарат тілшісі.

«Автожолдардың жай-күйі қазіргі экономикаға үлкен ықпал етуде. Бүгінде олардың дамуына қыруар қаражат бөлінуде. Біздің облыста да биыл 13 млрд теңгенің жұмыстарын жүргізу жоспарланған, 7 млрд теңге біздің облыс орталығына жұмсалады», - деп мәлімдеді әкім орынбасары.

Мысал ретінде Карплюк қыркүйек айында аяқталған Тобыл өзеніндегі көпірді қайта қалпына келтіру жұмыстарын атады.

«10 айға 3 млрд теңге жоспарланған мерзімінен бұрын игерілді. Облыс орталығын Ақтөбе облысы шекарасымен жалғайтын 114 шақырым автожолдардың құжаттық-сметалық құжаттамасын жасау біз үшін өте маңызды», - деді С.Карплюк.