Қостанайлық оқушы тасқын кезінде көпірлерді қираудан қорғайтын жоба жасап шықты

ҚОСТАНАЙ. KAZINFORM – Қостанайлық Виктор Рыжков ұстазы Виталий Базаркиннің жетекшілігімен су деңгейінің күрт көтерілуі кезінде көпірлердің бұзылуына жол бермейтін «Smart Bridge» инновациялық жүйесін құрастырып шықты. 

Оқу-ағарту министрлігі баспасөз қызметінің хабарлауынша, бұл идея Қостанай ауданы Александр мектебінің 10-сынып оқушысы Викторға 2024 жылғы көктемгі су тасқынынан кейін келген. 

Автоматтандырылған жүйе су деңгейінің критикалық көтерілуінің алдын алады: датчиктер алдымен қауіпті тіркейді, ал бағдарламаланған Arduino микроконтроллері көпірді бірден көтеру механизмін іске қосады. Оны тіпті күшті ағынмен де бұзудан қорғайды. 

— Менің мақсатым — адамдар мен инфрақұрылымның су тасқынына дайын болуына көмектесетін жүйені құру. Жобаны жасау барысында көтеру механизмін таңдау қиындық тудырды, бірақ оны сәтті жүзеге асыра алдық, - дейді Виталий Базаркин.

Болашақта Виктор көпірді көтеру функциясын және шұғыл қызметтерге автоматты түрде хабарлама жіберетін радио интеграцияны қосу арқылы модельді жетілдіруді жоспарлап отыр. Бұл дабылға жедел жауап беруге мүмкіндік береді. 

Жоба қазірдің өзінде жоғары бағаланып, «Ұлы өнертабысқа алғашқы қадам» Республикалық инновациялық идеялар байқауында «Өнеркәсіп саласындағы техникалық құрылыс» номинациясы бойынша бірінші орынға ие болды. 

Еске сала кетейік, бұған дейін атыраулық өрендердің мүгедектерді оңалтуға арналған құрылғы ойлап тапқанын хабарлаған едік.