ҚР банк жүйесіндегі шетел валютасымен депозиттердің үлесі төмендеп келеді - Д.Ақышев

АСТАНА. ҚазАқпарат - Соңғы 4 ай ішінде қаржы нарығын долларсыздандыру бойынша тұрақты үрдіс қалыптасып отыр. Бұл жөнінде Астана экономикалық форумының жұмысы барысында бұқаралық ақпарат құралдарының өкілдеріне ҚР Ұлттық Банкінің төрағасы Данияр Ақышев хабарлады.

Ол бұл үрдістің банк жүйесіндегі шетел валютасындағы депозиттер үлесінің төмендеуінен байқалады деп түсіндірді. «Долларландырудың ең жоғары деңгейі байқалған қаңтардан бастап сәуірдің соңында шетел валютасындағы депозиттердің жалпы көлемі 70%-дан 60%-ға дейін, оның ішінде жеке тұлғалардікі 80%-дан 71,7%-ға дейін, заңды тұлғалардікі - 62%-дан 52,5%-ға дейінтөмендеді», - деп ҚР ҰБ басшысы цифрларды келтірді.

Соған қарамастан, оның айтуынша, 2016 жылғы сәуірдің соңында депозиттердің жалпы көлемі жылдың басынан бастап 2,3%-ға ұлғайып, 16,3 трлн. теңгені құрады. бұл ретте, теңгедегі депозиттердің өсімі 31% болды, шетел валютасында 10,5%-ға төмендеу орын алды.

«Болашақта біз теңгедегі салымдардың өсу үрдісінің жалғасуын күтеміз, бұл экономиканы теңгеде кредиттеуді кеңейту үшін алғышарттар құратын болады», - деп түйді қаржы реттеушісінің басшысы.