ҚР Туризм және спорт вице -министрі Бөгенбай батыр атындағы дарынды балалар спорт мектебінің жұмысымен танысты
деп хабарлайды ҚазАқпарат тілшісі.
Вице-министр Степногор қаласындағы Бөгенбай батыр атындағы дарынды балаларға арналған облыстық спорттық мектеп-интернатта жас буынды тәрбиелеу ісімен, алдағы бағыт-бағдарларымен танысты. Біліктілер мен мықтылар мекенінде өңірдің әр түкпірінен қабылданған 232 балғын шеберліктерін шыңдап, білімдерін жалғастыруда. Балғындар тәрбиесіне 35 білікті ұстаз тартылған. Жалпы орта біліммен бірге спорттың тоғыз түрінен дайындық жүргізіледі. Бес кабинетте балалар денсаулығы тиянақты бақылауға алынған. Алда он жылдығын атап өткелі отырған білім мен спорт шаңырағында күрестен еліміздің бес чемпионы дайындалған. Ал ауыр атлетші Ирина Некрасова Бейжің олимпиадасының күміс жүлдегері атанды. Қ. Өскенбаев кездесу барысында Елбасының Қазақстан халқына Жолдауы турасында ойымен бөлісті. Вице-министр:«Жылдың маңызды құжатында бес басым бағыт айқындалған. Соның ішінде Елбасы спорттың жаппай сипат алуына ерекше ден қойып, баршамызға үлкен жауапкершілік жүктеп отыр. Ертеңгі болашағымыз - жас буынды тәрбиелеу ісіне мемлекеттік маңызда назар аударылуда. Әр ауданда жалпы сомасы 300 миллион теңге төңірегінде спорт кешенін салу жоспарлануда. Мұның өзі спорттың қоғамдық сипат алуына себепкер болмақ. Сонымен бірге туризмді дамыту, оның алғы шарттарын бүгіннен іске асыру, мейманханалар мен жол бойы сервисін жақсартуға ерекше мән беріліп отыр. «Бурабай» спорт кешені салынды. Бурабай баурайында ауыз су, коммуналдық инфрақұрылым шешімін тапқан», деді. Кездесу барысында туындаған сауалдардың дені спортшыларды толыққанды тамақтандыру, еңбекақы мен зейнетақыны өсіру, мектеп-интернаттың матриалдық жағдайын одан әрі жақсарту төңірегінде өрбіді. Мейман «Степногор подшипник зауыты» акционерлік қоғамында жұмысшылармен жүздесіп, Жолдаудың басым бағыттарын түсіндіріп, сауалдарына жауап қайтарды.
Вице-министр кеше Шоқан Уәлиханов атындағы Көкшетау мемлекеттік университетінде, «Бурабай» қысқы спорт кешенінде болып, ұжым мүшелерімен Елбасының Жолдауы жөнінде пікір алмасты.