Құм-қиыршық тастарын заңсыз өндіріп келген ЖШС директорына 10 млн. теңгеден астам айыппұл салынды

ОРАЛ. 22 сәуір. ҚазАқпарат - БҚО мамандандырылған табиғат қорғау прокуратурасы рейдтік шаралар барысында құм-қиыршық тас қоспасын заңсыз өндірген «Фирма Интел Батыс» ЖШС директоры Д.Тюлькинді құрықтады.

Облыс прокуратурасының баспасөз қызметінен түскен мәліметке қарағанда, БҚО бойынша экология департаменті Д.Тюлькинді ҚР Әкімшілік құқықбұзушылық кодексінің 122-бабы бойынша әкімшілік жауапкершілікке тартып, оған 50 АЕК (86550 теңге) көлемінде айыппұл салды. Сондай-ақ ЖШС басшысына қоршаған ортаға келтірілген 10 млн. теңгеден астам соманы өндіріп алу жөнінде талап қойылды.