Квазимемлекеттік сектор субъектілері бюджетке аударылуы тиіс қаражаттарды депозиттерде сақтап отыр - Қ. Жаңбыршин

АСТАНА. ҚазАқпарат - Квазимемлекеттік сектор субъектілері таза табыстарын уақытылы бюджетке аудармайды және бұл қаражаттарын депозиттерде сақтап отыр. Бүгін Парламент Сенатында 2015 жылғы республикалық бюджеттің атқарылуы туралы Үкіметтің есебіне Республикалық бюджеттің атқарылуын бақылау жөніндегі есеп комитетінің қорытындысы туралы баяндаған комитет төрағасы Қозы-Көрпеш Жаңбыршин осылай мәлім етті.

«Талдау барысында квазимемлекеттік сектор субъектілерінің қызметінде олқылықтар анықталды. Бұл ретте мемлекеттің қатысуындағы субъектілер қызметінің жүйелі проблемалары әлі де қайталанып келеді. Біздің пікірімізше, бұл олардың таза табысының бір бөлігін бюджетке уақытылы немесе мүлдем аудармауы болып отыр. Квазимемлекетитік сектор субъектілерінде таза табысының бір бөлігін төлеген кездің өзінде бюджетке аударылған қаражаттан да айтарлықтай қомақты қаражат қалады. Олар көбінесе екінші деңгейлі банктердегі депозиттерге орналастырылады», - деді Есеп комитетінің төрағасы.

Оның айтуынша, квазимемлекеттік сектор субъектілері өз қызметтері барысында бюджетитік және басқа да заңнамалық бұзушылықтарға жиі жол беріп келеді. «Дегенмен, залал келтіретін шығыс нормаларының сақталмағандығы үшін квазимемелкеттік субъектілер үшін жауапкершілік қаралмаған», - деді ол.