Қырымбек Көшербаев Илья Ильинді туған күнімен құттықтады (ФОТО)

ҚЫЗЫЛОРДА. ҚазАқпарат - Бүгін Қызылорда облысының әкімі Қырымбек Көшербаев екі дүркін Олимпиада және төрт дүркін әлем чемпионы Илья Ильинді жаттығу залына барып, туған күнімен құттықтады. Бұл туралы әкімдіктің баспасөз қызметі хабарлады.

Аймақ басшысы Қырымбек Елеуұлы Ильяға жылы лебізін жеткізіп, сый-сияпатын көрсетті. Рио-де-Жанейрода өтетін Олимпиадаға дайындығын сұрап, жеңіске жетуіне тілектес екенін айтты.

«Илья, мен сені бүкіл Сыр жұртшылығының атынан туған күніңмен шын жүректен құттықтаймын. Біз сенімен, сенің жетістіктеріңмен мақтанамыз. Алдағы уақытта да сенен тек жеңіс күтеміз. Саған әрқашан қолдау көрсетуге дайынбыз», - деді облыс әкімі Қырымбек Көшербаев.

«Менің қуанышымды бөлісіп, арнайы жаттығу залына келгендеріңіз үшін ризашылығымды білдіремін. Қазір біз қызу жаттығу үстіндеміз. Әр жарыстың алдында мен өзімнің туған жерім Қызылордаға келіп, осы залда жаттығу жасаймын. Ең алғаш үлкен спортқа қадам жасаған жерім болғандықтан, бұл мен үшін өте маңызды. Мен төрт жылдықтың басты бәсекесінде жеңіске жетіп, көк туымызды желбіретуге уәде беремін», - деді Илья Ильин.