Қызылорда әлеуметтік салаға қаржы бөлуден бірінші орында - облыс әкімі (ФОТО)

Әлеуметтік саланың дамуына келер болсақ, соңғы үш жылда білім беру саласына 188 миллиард теңге қаржы бөлінді. Жүйелі жүргізілген жұмыстың нәтижесінде бұл саладағы бірқатар маңызды мәселелер тиімді шешімін тапты.
2015 жылы 3 пен 6 жас аралығындағы балаларды мектепке дейінгі тәрбиемен қамту 100 пайызға жетті. «Балапан» бағдарламасы аясында бұл көрсеткішке қол жеткізу 2020 жылға жоспарланған болатын. Сыр елі мемлекеттік-жекеменшік әріптестік негізінде бұл міндетті мерзімінен бұрын орындады. Тек өткен жылы мемлекеттің қолдауы арқасында облыста 80-ге тарта жеке меншік балабақша ашылды. Бұл тәжірибе республиканың басқа аймақтарына үлгі ретінде таратылуда.
- Өткен жылы Байқоңыр қаласының қазақ тілді 5 мектебі мен 1 балабақшасын Ресейден Қазақстанның қарамағына қайтардық. Ол мектептерге қажетті құрал-жабдықтар алынып, ұстаздарын жан-жақты қолдау шаралары жасалды. Соңғы жылдары біз апатты мектептер мәселесін шешуге мықтап кірістік. 2013 жылы 36 апатты мектеп болса, екі жылда соның 25-ін жаңадан салып шықтық. Қалған 11 апатты жағдайдағы мектептердің құрылысын бұйырса ағымдағы жылы мемлекеттік-жекеменшік әріптестік негізінде шешеміз, - деді облыс әкімі Қ.Көшербаев.
2015 жылы Ұлттық бірыңғай тест нәтижелері бойынша облысымыз ең үздік бес облыстың қатарына кірді.
.