Қызылорда облысы: Қазалы ауданында «Арал-Сарбұлақ» топтық су құбырының 5-кезеңі пайдалануға берілді

ҚЫЗЫЛОРДА. 9 қаңтар. ҚазАқпарат /Жаңагүл Сердалы/ - Қызылорда облысы Қазалы ауданындағы Бозкөл ауылында топтық су құбырының бесінші кезеңі мәреге жетті.

Осыған орай осы ауылда орналасқан тораптық су құбырының су айдау стансасы іске қосылды.

Оның ашылу салтанатында сөз сөйлеген облыс әкімі  мұның бәріне тәуелсіз­ді­гіміз бен ауызбірлігіміздің арқасында қол жет­кізіп отырға­нымызды атап өтті. Елімізде және облысымызда жасалып жатқан нәтижелі жұмыстарға қысқаша тоқталған аймақ басшысы:

- «Ақбұлақ» бағдарламасы Елбасы­ның тікелей тапсырмасы бойынша бүгін­де бүкіл елімізде жүзеге асырылуда. Бұл бағдар­ламаның ерекшелігі - сапалы таза ауыз су бюджет қаржысы есебінен үй ішіне кіргізіліп беріледі, - деді.

Айта кетейік, Арал-Сарбұлақ топтық су құбырының құрылысы солтүс­тіктегі екі ауданда 2006 жылы басталды. Кезең-кезеңімен жүзеге асырылып келе жатқан мемле­кеттік «Таза су» бағдарла­масының игілігін бүгінде қос аудандағы 45 елді мекен көріп отыр. Аталған топтық су құбырының 5-кезеңіне 2010-2011 жылдарға республика бюджетінен 4,6 млрд. теңге бөлінді. Тораптық су құбырының су айдау стансасы, яки, 1000 текше метрлік су сақтау қоймасы мен бас сорғысы осы Бозкөл ауылына орнатылып, бірнеше тұрғын жұмысқа орналасты.

 Салтанатты шарада Лақалы ауылының тұрғыны, Социалистік Еңбек Ері Кәрбоз Әлимаев облыс басшысымен бірге су сорғысы стансасын іске қосты. Ал ауылдық ардагерлер кеңесінің төр­ағасы Нұртай Базаров тұрғын­дар атынан жүрекжарды алғысын жеткізді. Мұнан соң қонақтардың назарына ауыл тұр­ғыны Күншығар Әбіловтің тұрғын үйіне кіргізілген сервистік желі ұсы­нылды. «Бұған дейін ауыл тұрғындары суды баспа құдықтан ішетін. Адам денсаулығы үшін таза судың маңызы зор. Сапалы суды үйімізге кіргізіп берген бағдар­ламаға, басшыларға айтар алғы­сымыз мол», - деді үй иелері.