Қызылорда облысында қысқа дайындық жұмыстары баяу жүргізілуде

ҚЫЗЫЛОРДА. Тамыздың 13-і. ҚазАқпарат /Руслан Игілік/ - Қызылорда облысында алдағы қысқа дайындық жұмыстары баяу жүріп жатыр. Мұны облыс әкімдігінің алқа мәжілісінде облыс басшысының өзі атап айтты.

Аймақта биыл осы мақсатқа жергілікті бюджеттен 4,7 млрд. теңге бөлінген еді.Соған қарамастан қыстық отынды дайындап алуда бейқамдық бар. Мәселен, жылу маусымына бюджеттік мекеме­лерге 76,6 мың тонна көмір қоры қажет болса, қазіргі таңда соның іс жүзінде 16,6 мың тонна көмірдің қоры ғана жинақталған. Бұл жоспар­дың 21,7 пайызға орындалғанын айқын­дайды. Ал Арал ауданында жос­пар­ланған 4,9 мың тонна көмірдің бар болғаны 1,6 мың тоннасы дайын. Қармақшы ауданына 7 мың тонна көмір қажет болса, оның 800 тоннасы алынды. Сырдария мен Шиелі аудан­да­рында да көмір қоры жеткіліксіз. Қыстан қысылмай шығу үшін бюджеттік мекеме­лерге қажетті 57,4 мың тонна сұйық отынның 4 мың тоннасы ғана әзір тұр. Ал жылу-энергия көздеріне 31 мың тонна мазут қажет болса, ол мүлдем жоқтың қасы.

Жылу маусымында назар аударатын ең басты мәселе - бұл білім беру нысан­дарының дайындығы. Арал ауданында 72 білім беру мекемесінің жылу жүйелерін жөн­деу жұмыстары әлі басталған жоқ. Қазалы ау­да­нындағы 56 оқу орнының 49-ы қысқа дайын. Жаңақорған мен Қармақ­шы аудандары мектептерінің де жылу маусымына дайындығы онша мәз емес. Жалпы, облыс бойынша жоспарланған 103 қазан­дықтың 55-не жөндеу жұмыс­­тары жүргізілген. Сонымен қатар, 20,2 шақырым жылу желілерінің 16,2 шақы­рымына тыңғылықты жөндеу жасалды.

Денсаулық саласына тиесілі 338 нысанның 270-і жөнделді. Мәдениет мекемелерінің 52 пайызы, тұрғын үйлер­дің 15 пайызының ғана жылу желілері жөндеуден өткізілді. Бұған қосымша, коммунал­дық қызмет үшін қарыз­данып қалған аудандар да баршылық. Арал ауданы - 13 млн. 183 мың теңге, Жалағаш ауданы 6 млн. 327 мың теңге берешек.