Қызылорда облысының Кеден департаменті БАҚ өкілдерінің қатысуымен Арал ауданында баспасөз-тур өткізді
Журналистерге хабарлама жасаған департаменттің баспасөз қызметінің бас маманы Бақыт Орданова кеден саласының тарихына, жетістіктеріне кеңінен тоқталды. Кеден қызметінің іргесі облыста 1992 жылы қаланған. Әдепкіде Шымкент кеденіне қараған «Қызылорда кеден бекетінде» небәрі 6 қызметкер жұмыс істеген болатын. Қазіргі таңда құрамында 6 бекеті, 4 басқармасы, көптеген бөлімдері бар салада 192 адам еңбек етеді. Бүгінде материалдық-техникалық базасын күшейтуде. Шетелдік инвесторлардың келуімен кедендік бақылау департаментінің жұмыс ауқымы да ұлғайды. Жүк тасымалдау көбейіп, кеден төлемдері, салықтарының мөлшері өскен. Өткен жылмен салыстырғанда үстіміздегі жартыжылдықта сыртқы сауда айналымында өсу динамикасы байқалады. Алғашқы жартыжылдықта сыртқы сауда айналымы 544 млн. 621 мың АҚШ долларын құрап отыр. Бұған импорт, экспорт көлемінің артуы әсерін тігізуде.