Қызылордада «Мұстафа Шоқай» спектаклінің тұсаукесер қойылымы өтті
деп хабарлайды ҚазАқпарат тілшісі.
Қойылым бала Мұстафаның қазақ жеріне көз алартқан орыс патшасының озбырлығына қарсылығын танытатын көріністен басталды. Елінің есесін түгендеуге ұмтылған тұлғаның бала шағын бейнелейтін осы бір сәттен-ақ оның басынан кешкен қилы оқиғалар көрермен көз алдынан сырғып өте берді.
Жалпы, Мұстафадай тұлғаны толық танытуға арналған тұңғыш спектакль сәтті өтті. Драматург Рахымжан Отарбайдың туындысын сахналаған режиссер Хұсейн Әмір-Темір қойылым арқылы ұлт тәуелсіздігінің бастауында тұрған тұлға тұрпатын жан-жақты көрсетті. Арман-мақсаты бүгінмен өзектесіп жатқан қайраткер бейнесін әртіс Бақытбек Темірбеков сомдаса, Мария Шоқай рөлінде Қарлығаш Айтжанова ойнады. Қазақстан Жастар одағы «Серпер» сыйлығының лауреаты атанған қос әртістен бөлек алғашқы қойылымдағы табысты рөлдер қатарында Жұмабай Шерниязов ойнаған Әмірені де атап өтуге болады.
Қойылым соңында әртістермен бірге сахнаға көтерілген драматург Рахымжан Отарбай, режиссер Хұсейн Әмір-Темірге көрермен ықыласы ретінде гүл шоқтары ұсынылды.