Лондон-2012: Дарханның Олимпиада жүлдесінен үміті үзілді

АСТАНА. 7 тамыз. ҚазАқпарат - Лондон Олимпиадасында 66 келі салмақ санатында боз кілемге көтерілген палуанымыз Дархан Баяхметов

1/8 финалда литвалық палуан Эдгарас Венскаитиске есе жіберді.

Грек-рим күресі шеберіміз Олимпиада жүлдесі жолындағы іріктеу сынында сербиялық Алесандр Максимовичті 3:0 есебімен таза жеңген еді. Дегенмен 1/8 финалдан ары аса алмады.

Естеріңізге сала кетейік, спорттың бұл түрінен Қазақстан қоржынында бір ғана "қола" бар. Оны 84 келі салмақ санатында боз кілемге көтерілген Даниел Гаджиев жеңіп алған еді. Ал қалған спортшыларымыз жарыс жолынан шығып қалған болатын.

1985 жылы дүниеге келген Дархан Азия чемпионы, Венгрияда өткен  Гран-придің жеңімпазы, Қазақстанның бірнеше мәрте чемпионы. Ол елордада өткен Азиялық лицензиялық турнирде Қазақстан құрамасының қоржынына алтын медаль салған еді.