Мәжіліс депутаттары Батыс Қазақстанда кездесулер өткізуде

ОРАЛ. 1 шілде. ҚазАқпарат - Ауыл-аймақтарды аралап, өз сайлаушыларымен кездесулер өткізіп жүрген Мәжіліс депутаттары Самиғолла Оразов, Виктор Киянский, Шавхат Өтемісов және Еркін Шпанов 1 шілде күні Ақсай қаласындағы бірқатар құрылыс нысандарында болды.

Қонақтар Ақсай қаласында құрылысы жүріп жатқан аудандық емхана, 10-ықшамауданындағы көп пәтерлі тұрғын үй және «Нұр Отан» ХДП аудандық филиалы ғимаратының құрылыс алаңында болып, құрылысшылармен кездесті. Аудан әкімі Марат Түсіпқалиев Ақсай қаласы шағын қала мәртебесін алғалы құрылыс қарқынды жүргізіліп жатқанын мәлімдеді. Жаңа «Қарашығанақ - 1» ықшамауданы бой көтеруде. Мұнда қазір 75-90 пәтерлік екі тұрғын үйдің құрылысы жүргізілуде. Тұрғын үйлер алдағы күзде пайдалануға беріледі. «Әлім» ЖШС салып жатқан емхана осы айдың аяғына таман ашылмақ. Күні бүгін жұмыстың 90 пайызы атқарылды. Жаңа емхана қазіргі заманғы медициналық жабдықтармен қамтылды.

Мәжілісмендер ауданда «Қолжетімді баспана - 2020» бағдарламасы бойынша салынып жатқан тұрғын үйлердің сапасына назар аударды. Олар осы күні сондай-ақ қағаз қалдықтарын өңдейтін цехтың жұмысымен танысты.