Назарбаева венгриялық саяхатшыларды ЭКСПО-ға шақырды
Жүздесушілер Қазақстан мен Мажарстан қатынастарының стратегиялық сипатын атап өтті. Сенатор өткен жылғы желтоқсанның аяғында Қазақстан мен Еуроодақ арасындағы кеңейтілген әріптестік және ынтымақтастық туралы жаңа келісімге қол қойылғанына назар аударды.
«Біз Венгрияның Мемлекеттік жиналысымен қоса Еуропа Одағына мүше барлық мемлекеттердің ұлттық парламенттері Келісімді тезірек ратификациялайтынына сенім артып отырмыз», - деді Д.Назарбаева.
Сауда-экономикалық ынтымақтастық туралы айта келіп, тараптар екіжақты тауар айналымын арттыру қажеттігін атап өтті. Сенаттағы Венгриямен ынтымақтастық жөніндегі парламенттік топтың жетекшісі Д.Назарбаева екі ел арасындағы туристік сапарларды жиілетудің маңыздылығына тоқталды.
Сенатор Астанада өтетін халықаралық ЭКСПО-2017 көрмесі аясында венгриялық саяхатшыларды Қазақстанға келуге, сондай-ақ мажарлық инвесторларды Қазақстандағы ауыл шаруашылығы өнімдерін өңдеу саласында өндіріс ұйымдастыруға шақырды. Ж.Чутора Д.Назарбаеваға бірлескен инфрақұрылымдық және білім беру жобалары туралы хабардар етті. Ол Венгрия екі жүзге жуық қазақстандық студенттерді, оның ішінде аграрлық сала мамандықтары бойынша тегін оқытуды жоспарлап отырғанын айтты.