ОҚО-да Ұлттық жастар дельфийлік ойындары өтті (ФОТО)

АСТАНА. ҚазАқпарат - Оңтүстік Қазақстан облысында өнерлі жастарды қолдау және ел арасында таныту, оларды толерантты рухта тәрбиелеу, кәсіби өсуіне ықпал жасау мақсатында Ұлттық жастар Дельфийлік ойындарының облыстық байқауы өткізілді, деп хабарлады ОҚО әкімінің баспасөз қызметінен.

Биыл ХІІ рет шымылдығын түрген бұл байқауды Оңтүстік Қазақстан облысының жастар саясаты мәселелері жөніндегі басқармасының «Жастар ресурстық орталығы» ұйымдастырды.

Шығармашылық саланың 15 түрінен: фортепиано, баян-аккордеон, скрипка, домбыра, қылқобыз, академиялық ән салу, дәстүрлі ән, эстрадалық ән, халық биі, классикалық би, қазіргі заман биі, бейнелеу өнері, журналистика, поэзия және ұлттық қолөнер шығармашылығы сияқты номинациялар бойынша тартысты өткен шығармашылық додаға аудан-қалалардан 200-ден аса жас қатысты.
Ұлттық рух пен шынайы кәсібилік турасында жарысқа түскен жастардың 39-ы түрлі өнер аталымдар бойынша дипломдармен және арнайы сыйлықтармен марапатталды.
Байқау жеңімпаздары ағымдағы жылдың екінші жартыжылдығында Ақмола облысы, Степногорск қаласында өтетін ХІІ Ұлттық жастар Дельфийлік ойындарының Республикалық байқауына жолдама алды.