Оралда әскерде өзіне-өзі қол жұмсау деректерін болдырмау мәселелері талқыланды

ОРАЛ. ҚазАқпарат - Орал қаласындағы 5517-әскери бөлім базасында Орал гарнизонының әскери прокуроры, әділет полковнигі Алтынбай Раевтың төрағалық етуімен әскери құрылымдар мен қылмыстық тергеу органдары басшыларының және банк өкілдерінің қатысуымен ведомствоаралық кеңейтілген кеңес болып, онда биылғы бірінші жартыжылдық қорытындылары мен алда тұрған міндеттер айтылды.

Кеңесте аталып өтілгеніндей, өзіне-өзі қол жұмсау деректері әскерде де өзекті мәселе ретінде қалып отыр. Талдау көрсеткеніндей, әскери прокуратураның үйлестіруімен әскери құрылымдар алып отырған шаралар жағдайдың тұрақтануына септігін тигізуде. Қазіргі кезде әлімжеттік қарым-қатынастар салдарынан өзіне-өзі қол жұмсауға дейін жеткізу деректері жоққа жақын деп айтуға болады. Барлық дерлік суицидтердің себептері анықталған, бұл әлеуметтік негіздегі отбасылық-тұрмыстық мәселелер болып табылады.

Жиында баяндама жасаған Алтынбай Раевтың айтуынша, 2015 жыл әскерде өзіне-өзі қол жұмсаудан сақтандыру жылы болып жарияланған. 2014 жылы әскери қызметкерлер арасында 27 суицид тіркелген. Егер 2008 жылы елудей осындай оқиға тіркелсе, соңғы жылдары 25-27 дерек орын алып келеді. Тексеру көрсеткеніндей, өзіне-өзі қол жұмсаудың 60 пайызы несие бойынша қарыздар болып қалуға байланысты екен. Сондай-ақ тұрмыстық, жеке басқа қатысты мәселелер де әсер етеді. Осының бәрі зерттеліп, қосымша шаралар алынуда. Әскери құрылымдарда, құқық қорғау органдары мен қоғамдық ұйымдарда іс-қимыл жоспары жасалып, әскерде суицидті болдырмаудың бар амалы жасала беретін болады.

Кеңесте сондай-ақ «Батыс» өңірлік қолбасшысының тәрбие және әлеуметтік-құқықтық жұмыстар жөніндегі орынбасары, полковник Берік Омаров баяндама жасап, суицидтің алдын алу мәселелеріне тоқталды. Орал гарнизоны әскери бөлімдерінің командирлері, «Халық банкі» АҚ облыстық филиалы өкілдері өз ой-толғамдарымен бөлісті.

Жиын қорытындысы бойынша әскерде суицид көріністерінің алдын алу жұмыстарын жақсарту бағытында шаралар кешені жасалды.