Орыс қызы дарынды балаларға арналған қазақ мектебінде үздік оқып жүр

ОРАЛ. Қыркүйектің 23-і. ҚазАқпарат /Елжан Ералы/ - Антонина Казанина Орал қаласындағы дарынды балаларға арналған С.Сейфуллин атындағы №11 облыстық мектеп-интернаты кешенінде үздік оқып жүр, деп хабарлайды ҚазАқпарат тілшісі.

Бастапқыда қазақ балабақшасына барып, одан кейін аталмыш мектепке қабылданған Антонина қазір үшінші сыныпта. Оның әкесі Юрий Казаниннің айтуынша, қазіргі кезде екінші қызы да «Жұлдыз-ай» атты қазақ балабақшасына барып жүр. Ең бастысы, олар жүрек қалауына байланысты мемлекеттік тілді меңгеруде.

А.Казанина сабақты үздік оқумен бірге түрлі үйірмелерге қатысып, талабын шыңдап жүр. Әсіресе, ол қазақ тілінде ән салғанды ұнатады. Ол болашақта елінің алдыңғы қатарлы азаматы болуды армандайды.

Балаларын қазақ мектебіне берген өзге ұлт өкілдері Оралда аз емес.