Өскеменде Қазақстанның үздік тауарларының көрме-байқауы өтеді

АСТАНА. Тамыздың 12-сі. ҚаАқпарат - Тамыздың 13-і күні Өскемен қаласында Шығыс Қазақстан облысы бойынша өтетін «Қазақстанның ең үздік тауары» атты аймақтық көрме-байқауының ашылуына арналған брифинг өтеді. Баспасөз мәслихатына ҚР Индустрия және жаңа технологиялар министрлігі Техникалық реттеу мен метрология комитеті төрағасының орынбасары, Шығыс Қазақстан облысы әкімдігінің өкілдері, «Нұр Отан» ХДП облыстық филиалы жетекшілері мен «Атамекен» Қазақстанның ұлттық экономикалық палатасының басшылығы қатысады.

«Қазақстанның ең үздік тауары» көрме-байқауының негізгі мақсаты отандық өнімнің сапасын арттыруға бағытталған кәсіпорындар мен ұйымдардың қызметін белсендіру, Қазақстан нарығының жоғары сапалы және бәсекеге қабілетті өнімдермен толығуына көмектесу және халық арасында сапа туралы ойды танымал ету болып табылады.

Көрме-байқауға Шығыс Қазақстан облысының кәсіпорындары қатысады. Көрменің қорытындысы бойынша конкурстық комиссия жеңімпаздарды «Ең үздік азық-түлік тауарлары», «Халыққа арналған ең үздік тауар» және «Өндірістік бағыттағы ең үздік тауар» аталымдары бойынша марапаттайтын болады. Жеңімпаздар облыс Әкімінің арнайы дипломдарына ие болып, «Қазақстанның ең үздік тауарлары-2010» республикалық байқауы мен Астанада ағымдағы жылдың соңында өтетін ҚР Президентінің «Алтын сапа» жүлдесін алу үшін байқауға қатысу құқығына ие болады.