Павлодарлықтар джиу-джитсудан Еуропа чемпионатында табысты өнер көрсетті

ПАВЛОДАР. Сәуірдің 5-і. ҚазАқпарат /Вера Ливинцова/ - Павлодардағы «Жауынгер» Айки-Дзю-Дзюцу мектебінің тәрбиеленушілері Германияның Любц қаласында өткен джиу-джитсудан Еуропаның ашық чемпионатында тамаша өнер көрсетті.

Павлодарлық жас сайыпқырандар әлемнің 12 елінен 200 спортшы қатысқан осынау байрақты бәсекеде тоғыз бірінші орынды иеленіп, жалпыкомандалық есепте үшінші орынды жеңіп алды. Бұл - биыл 20 жылдығын атап отырған осынау павлодарлық спорттық клубқа және оның ұйымдастырушысы, қаржы полициясының подполковнигі Дәулет Әлжановқа жасалған тамаша тарту.

Ал мерейтой құрметіне сәуірдің 24-інде Павлодарда республиканың барлық өңірлерінен келетін спортшылардың қатысуымен республикалық турнир өтеді, деп хабарлады Ұлттық қауіпсіздік комитеті департаментінің баспасөз қызметінен.