Петропавлда мыңнан астам көпқабатты үйдің тек 9-ы қысқа әзірлік құжатын алды
«СевКазЭнерго» АҚ баспасөз қызметінің мәліметінше, облыс орталығын жылумен қамтып отырған «Петропавл жылу желілері» ЖШС биылға жоспарлаған жөндеу жұмыстарының жартысына жуығын, яғни 41,9 % аяқтады. Мамандардың күзге дейін 14 шақырымға жуық жылу желісін жаңартуы қажет.
Бұдан басқа жоспарланған 4 шақырым құбырдың жартысына жуығының жылу жібермейтін қаптамасы қалпына келтіріліп, 25 сорғы стансасындағы қондырғылар жөнделді.
Құбырлардың жөнделуіне байланысты қазіргі уақытта Петропавлда 3 жеке баспана және көпқабатты 8 тұрғын үй ыстық судан ажыратылған.
«Кәсіпорынның қондырғылары - 70,35 %, магистральды желілері - 76,37 %, тарату желілері - 60,04 % ескірген. Қазіргідей қалыпта ұстау үшін де жылда барлық құбыр желісінің шамамен 4 % - 18,4 км ауыстырып отыру қажет. Бірақ қазіргі тарифпен біз бұл ең төменгі деңгейді де жөндей алмай отырмыз. Ал тозу және жылу энергиясын жоғалту деңгейін азайту үшін жыл сайын барлық құбырлардың 5 %, яғни 23 км құбырды жаңалап отыру керек», - дейді кәсіпорынның бас директоры Андрей Калиничев.
«Петропавл жылу желілері» ЖШС мамандарының айтуынша, қысқы жылыту маусымынан сәтті өтудің бір жолы – баспананы жылыту маусымына сапалы дайындау. Петропавлда 1090 көпқабатты тұрғын үй болса, соның 183-і жылыту жүйесіне гидравликалық сынама жүргізіп, жуған. Әзірше тек көп қабатты баспаналардың тек тоғызы ғана қысқы жылыту маусымына әзірлік құжатын алды.