Сауда-экономикалық ынтымақтастық қазақстан-қытай қарым-қатынасының тартушы күші болып қала беруде - Ө.Шөкеев
Бұл туралы жұма, желтоқсанның 4-інде Бейжіңде басталған Ынтымақтастық жөніндегі қазақстан-қытай комитетінің бесінші мәжілісінде Қазақстанның бірінші вице-премьері Өмірзақ Шөкеев мәлім етті.
Қазақстанның бірінші вице-премьерінің атап көрсетуінше, тараптар тауар айналымын 2015 жылға дейін 15 миллиард АҚШ долларына жеткізу туралы мемлекет басшылары қойған міндетті мерзімінен бұрын орындап отыр. 2008 жылы тауар айналымы 17,5 миллиард АҚШ долларынан асты. Бірақ та қаржы-экономикалық дағдарысы оның динамикасына теріс әсер етті. Қазақстанның статистикалық қызметінің мәліметі бойынша, 2008 жылдың сәйкес кезеңімен салыстырғанда, 2009 жылдың қаңтар-қыркүйек айларында тауар айналымы 20 пайыздан астамға төмендеген.
«Осыған байланысты, дағдарыстың теріс әсерін азайту мақсатында, біз өзара іс-қимылдарды, әсіресе тауар айналымын әртараптандыру, жоғары қосымша құнды өнімдердің үлесін арттыру, экономиканың шикізаттық емес секторларындағы Қазақстан Республикасының үкіметі мен Қытай Мемлекеттік кеңесінің арасындағы ынтымақтастық бағдарламасының Іс-шаралар жоспарын біртіндеп жүзеге асыру бағытындағы іс-әрекеттерді күшейтуіміз керек», деп атап көрсетті Ө.Шөкеев өз сөзінде.