Сенбіде елдің басым аумағында күн ашық болады - Қазгидромет

АСТАНА. 6 қаңтар. ҚазАқпарат - Сенбі, 7 қаңтар күні Қазақстанның басым аумағына антициклон ықпалының сақталуына байланысты, күн райы ашық болады деп болжануда.

Ал елдің оңтүстік және батыс аймақтарында атмосфералық ағымдардың әсерінен аздаған қар жауып, кей жерлерге тұман түсуі ықтимал. Бұл туралы «Қазгидромет» қызметіне сілтеме жасап ҚР ТЖМ-ның баспасөз қызметі хабарлады.

Атап айтқанда, Атырау, Ақтөбе, Жамбыл, Оңтүстік Қазақстан облыстарының кей жерлеріне тұман түсіп, 15-20 м/с жылдамдықта жел соғады.

Батыс Қазақстан, Маңғыстау өңірлерінде 15-20 м/с жылдамдықпен жел тұрауы ықтимал.

Қызылорда, Солтүстік Қазақстан, Қарағанды, түнде Қостанай облыстарында тұман болжануда.

Алдағы үш тәулікте Қазақстанның сулы нысандарында мұз қату процесі жалғасады. Республиканың оңтүстік, оңтүстік-шығыс және шығысындағы өзендерде су деңгейінің ауытқуы байқалады, жекелеген өзендерде су деңгейі көтерілуі ықтимал. Қайраққұм су қоймасынан су жіберу көлемінің ұлғайтылуына байланысты Шардара су қоймасына келетін су ағыны артады.