Шығыс Қазақстан облысында бірнеше күнге ұласқан дала және орман өрттері ауыздықталды
Еске сала кетсек, 19 қыркүйек күні ШҚО Ұлан ауданы, Тарғын ауылдық округіндегі Синегорье орман шаруашылығында өрт шыққан еді. Тілсіз жау 22 қыркүйек күні сағат 1-де ауыздықталып, тек бір жеті өткеннен кейін толығымен жойылды. 1000 гектар жерді, соның ішінде 15 гектар орман алқабын жойған жалынмен күресті Синегорье орман шаруашылығының 35 адамы мен 3 техникасы жүргізді.
ҚР Төтенше жағдайлар министрлігінен хабарлағандай, ШҚО Риддер қаласындағы Орталық орман шаруашылығында осыдан 6 күн бұрын басталған ірі өрт те ауыздықталды. Онымен күреске орман шаруашылығының 115 адамы мен 10 техникасы және ҚР ТЖМ ШҚО бойынша ТЖД өрт сөндіру қызметінің 10 адамы мен 2 техникасы жұмылдырылды. Өрт 347 гектар, соның ішінде 100 гектар орманды алқапты жойды.
Құтқарушылар анықтағандай, төтенше оқиғалар салдарынан құрбан болғандар мен зардап шеккендер жоқ.