Шымкенттіктерді шулатып келген қылмыстық топ құрықталды - ІІМ

АСТАНА. 2 мамыр. ҚазАқпарат - Оңтүстік Қазақстан облыстық ІІД қызметкерлерінің жедел-іздестіру шаралары нәтижесінде бірнеше қарақшылық шабуыл жасаған 23 пен 33 жас аралығындағы алты адамнан тұратын облыс тұрғындарынан құралған қылмыстық топ құрықталды. Бұл туралы бүгін өткен баспасөз мәслихатында ҚР ІІМ ресми өкілі Нұрділдә Ораз мәлім етті.

Н. Ораздың мәліметінше, тергеу амалдарын жүргізу барысында күдіктілер биылғы наурыз айында түнгі сағат 3-те Қазығұрт ауданына қарасты Тұрбат ауылындағы 25 жасар азаматтың үйіне басып кіріп, пышақпен қорқыту арқылы 3 ұялы телефон мен жалпы сомасы 850 мың теңгені құрайтын алтын әшекейлерді қолды қылғандығы белгілі болды. Сондай-ақ, 10 сәуір күні Шымкент қаласындағы тағы бір отбасы аталған қылмыстық топтың шабуылына тап болған. Таңғы сағат 4-те Казправда көшесіндегі үйге басып кірген қарақшылар үй иесінің жұбайының, 20 жасар жиен қызының және кішкентай бүлдіршінінің қол-аяғын скотч жабысқақ лентасымен матап тастап, ұялы телефон, 10 мың теңге және «Ниссан-премьера» маркалы автокөлікті иемденіп кеткен.

«Қазіргі таңда тәртіп сақшылары ұсталған азаматтардың осыған ұқсас басқа да қылмыстарға қатысы бар-жоғын анықтау мақсатында жедел-іздестіру мен тергеу шараларын әрі қарай жалғастыруда», - деп атап өтті Н. Ораз.