Сыр өңірі жыл соңына дейін Ақтөбе облысына 11 мың тонна азық-түлік жеткізбек

ҚЫЗЫЛОРДА. ҚазАқпарат - Қызылорда мен Ақтөбе облыстары арасындағы аймақаралық байланыс биылғы жылдың наурыз айынан басталды десе болады. Мемлекет басшысының өңіраралық кооперацияны дамыту туралы бастамасын алғашқылардың бірі болып қолға алған қос облыстың әкімдері осы уақытқа дейін бірқатар істерге ұйытқы болды, - деп хабарлады ҚазАқпарат облыстық әкімдіктің баспасөз қызметіне сілтеме жасап.

«Биылғы наурызда Сыр халқы ақтөбеліктерге ауыл шаруашылығы өнімдері мен тауарөндірушілердің көрме-жәрмеңкесін ұйымдастырып, көпшілікке тиімді бағада нарыққа шығарды. Ал, мамыр айында аймақ басшылары тауарларды өзара жеткізу туралы 3,3 млрд. теңгені құрайтын 30-дан астам келіссөзге қол қойды. Нәтижесінде, ақтөбеліктер біздің өңірге құрылысқа қажетті қиыршық тас, қызыл кірпіш, тіркемелі техникалар мен өрт сөндіру құралдары, сондай-ақ жылу оқшаулағыш құбырлар, арматураларды жеткізуді өз міндетіне алды. Сәйкесінше, Қызылорда жыл соңына дейін Ақтөбе облысын 11 мың тонна азық-түлік пен ауыл шаруашылығы өнімдерімен қамтымақ. Сондай-ақ, бүгінде біздің өңір батыстан асыл тұқымды мал басын сатып алуда», - деді Қызылорда облысының әкімі Қырымбек Көшербаев қос өңір басшылары мен аудан әкімдері қатысқан жиында.

Сондай-ақ, өз кезегінде Бердібек Сапарбаев ақтөбеліктер атынан Сыр еліне алғысын білдіріп, дәмі мен сапасы жоғары Қызылорданың ақ маржаны мен балығын батыстағы көршілер жақсы бағалайтынын жеткізді.