Төретам кентінде 200-ге тарта Ұлы Отан соғысы ардагерлеріне мерекелік медальдар табысталды - Қызылорда облысы
Шара барысында Қармақшы ауданының әкімі Биғали Қаюпов қарт жауынгерлерді Ұлы Жеңістің 65 жылдығымен құттықтады.
Ұлы Отан соғысына Қармақшы аумағынан жалпы бес мыңға жуық сарбаздар қан майданға аттанған болса, олардың елге жартысы ғана аман оралды. Ал бүгінде сол майдангерлеріміздің қатары едәуір сиреді.
Қармақшы аудандық жұмыспен қамту және әлеуметтік бағдарламалар бөлімінің ресми мәліметі бойынша, қазіргі таңда 700-ден астам соғыс және тыл ардагерлерін мемлекет қамқорлығына алып, мерейтой қарсаңында республикалық бюджет пен облыс қазынасынан бір реттік қолдау көрсету үшін 12 млн.теңге бөлінген. Сондай-ақ олардың үйлерін жөндеу мен құрылыс материалдарын жаңартуға 3 млн. 500 мың теңге қаржы жұмсалуда.
Байқоңыр қаласы әкімшілігінің басшысы Александр Мезенцев Төретам кентіндегі төлқұжат тіркеуінде тұрған Жұматай Мұстафаев, Қали Қуатов және Едіге Алданов есімді соғыс ардагерлеріне көпқабатты үйлерден пәтер беретіндігі жөнінде айта кетті.