Түркіменстан Қазақстанмен шекараны уақытша жапты

АҚТАУ. ҚазАқпарат -Көршілес елдің басшысы шекара маңындағы өңірлерге жұмыс сапарымен баруына байланысты Түркіменстанда шекарадағы қауіпсіздік шаралары күшейтілді. Сондықтан 2016 жылдың 29 мамырына дейін жеңілдетілген тәртіпте республикаға баратын шетел азаматтары уақытша кіргізілмейді.

Бұрын қол жеткізілген келісімге сәйкес, Маңғыстау облысында тұратын Қазақстан азаматтары Түркіменстанның Балқан уәлаятына 5 тәулікке дейін визасыз кіре алады. Қазақстан азаматтарының тұратын орны жеке куәліктегі (төлқұжаттағы) тұрғылықты мекен-жай белгісі негізінде анықталады. Түркіменстан Республикасының ұлттық заңнамасына сәйкес, тиісті тәртіпте виза ресімдеген азаматтар елде көбірек жүре алады.

«Қазір қазақстандық-түркімендік шекарада «Темір-баба» автомобильді өткізу бекеті орналасқан. Онда кеден бекеті мен «Болашақ» теміржол кедендік бекеті орналасқан. «Темір-баба» шекара маңындағы өткізу бекеті Қарақия ауданында Ақтау қаласынан 335 шақырым жерде орналасқан. «Болашақ» теміржол кедендік бекеті автомобильдерді өткізу бекетінен 80 шақырым жерде орналасқан», - деді Маңғыстау облысы бойынша мемлекеттік кірістер департаменті ұйымдастыру-қаржылық басқармасының басшысы Мақсат Ақмұратов.