Велоспорттан Алматы облысында дәстүрлі «Джейран трофи» көпкүндігі аяқталды

АЛМАТЫ. 8 мамыр. ҚазАқпарат - Алматы облысында 3-7 мамыр күндері тау велосипедінен VІ «Джейран трофи» көпкүндігі өтті.

Қазақстан, Қырғызстан және Ресей спортшылары қатысқан жарыста бұл жолы екатеринбургтік Михаил Будьконың жолы болды. Ал алматылық Эдуард Лоренц пен Жандос Бақытбекұлы 2-3 орынды өзара бөлісті. Былтыр М. Будько Қазақстан чемпионы Кирилл Казанцев пен Ресейдің Красноярск қаласынан келген Виталий Могаға есе жіберіп үздік үштікті түйіндеген болатын. Ал бұған дейін мұнда 3 дүркін чемпион атанған Қырғызстанның Бішкек қаласынан келген Жаныбек Сатканалиев денсаулығы сыр беріп жарыс жолынан шығып қалды. Былтыр оның темір тұлпары бұзылып, 6-шы орынды қанағат тұтқан болатын.