Жетісуда медициналық қалдықтарды заңсыз жойғандарға 2 млн теңге айыппұл салынды

АСТАНА. KAZINFORM — Жетісу облысында медициналық қалдықтарды кәдеге жарату кезінде заң бұзушылықтар анықталды, деп хабарлайды облыстық прокуратураның баспасөз қызметі.

Жетісу облысында қауіпті медициналық қалдықтарды арнайы рұқсатсыз (лицензиясыз) өңдеп, жойған мердігер ұйымдар әшкереленді.

Заң бойынша (Денсаулық туралы кодекстің 100-бабы), Г класына жататын медициналық қалдықтар — адам денсаулығы мен қоршаған ортаға өте қауіпті. Олар өндірістік қалдықтармен бірдей деңгейде қарастырылады. Мұндай қалдықтарды жою үшін арнайы лицензия қажет (Экологиялық кодекстің 336-бабы).

— Алайда тексеріс барысында лицензиясы жоқ 8 мердігермен келісімшарт жасалып, олар қауіпті қалдықтарды өңдеп, жойғаны анықталды. Осы заңбұзушылықтар үшін табиғат қорғау прокуратурасы шара қолданып, тәртіп бұзған мердігерлерге 2 миллион теңгеден астам айыппұл салынды, — делінген ведомство хабарламасында.

Сонымен қатар, осы келісімшарттарға жауапты болған 8 лауазымды тұлға тәртіптік жазаға тартылды.

Бұдан бұрын Жетісу облысында мемлекеттік жер қорын өз бетінше пайдалануға жол берілмегенін жазған едік.