Жол полицейіне пара ұсынған азамат үш жылға бас бостандығынан айырылуы мүмкін

АСТАНА. 18 сәуір. ҚазАқпарат - Жол полицейіне пара ұсынбақ болған Солтүстік Қазақстан облысының тұрғыны үш жылға бас бостандығынан айырылуы мүмкін. Бұл туралы Ақмола облысының Ішкі істер департаментінен хабарлады.

Сенбі, 16 сәуір күні сағат 22.00-де Ақмола облысының Жол полициясы басқармасы «Астана-Петропавл» автожолының 198 шақырымында Макинск қаласының маңында СҚО Тайыншы ауданы, Үлкен Өзен ауылының 25 жастағы тұрғынының басқаруындағы «Subaru-Legassi» автокөлігін тоқтатты. Жүргізуші Петропавл қаласына бет алып келе жатты. Құжаттарды тексеру барысында жүргізушіде сақтандыру полисі жоқ екендігі анықталды.

«ҚР Әкімшілік құқықбұзушылық туралы кодекстің 175-бабы 2-тармақшасы бойынша әкімшілік хаттаманың толтырылмауы үшін жүргізуші жол полицейіне 5 мың теңге көлемінде сыйақы ұсынды. Бірақ полицей өз қызметіне адалдығын көрсетіп, полицейлер азаматты пара беру үстінде ұстады», - делінген хабарламада.

ЖПБ-дан атап өткендей, жүргізуші ҚР Қылмыстық кодексінің 312 бабында көрсетілген (пара беру) қылмыстық әрекетін жасады. Аталмыш баптың санкциясы 700-ден 2 мың АЕК-ға (1 АЕК - 1512 теңгеге тең) дейінгі айыппұл салуды немесе 3 жылға дейін бас бостандығынан айыруды қарастырады.