Жыл басынан бері Қазақстан мұнайының Қытайға жеткізілімі 6 миллион тоннадан асты

БЕЙЖІҢ.    Қарашаның  4-і.  ҚазАқпарат /Руслан  Сүлейменов/ -     Қытай Халық Республикасы    Шынжаң-Ұйғыр   автономиялық   өлкесінің  кедендік  органдарының мәліметтері  бойынша,    ағымдағы жыл басынан бері  «Атасу-Алашаңкоу»  құбыр  желісі  бойынша    мұнай  жеткізілімі    6 миллион  тоннадан  асып отыр. 

Бұл көрсеткіш    өткен жылдың сәйкес кезеңімен  салыстырғанда 20 пайызға  көп.

Ұзындығы  962,2   шақырымды   құрайтын  «Атасу-Алашаңкоу»   мұнай  құбырының  құрылысы  2004   жылы басталғанын  айта кету керек.    Қазақстандық    шикі мұнайдың   алғашқы    партиясы бұл құбыр желісімен   Алашаңкоуға    2006   жылы мамырдың 25-де    келіп  жетті.

Содан бері      құбыр  арқылы ағылған    «қара алтынның»  жылдық өсімі   20   пайызды құрады.   Қазіргі уақытта  мұнай   жеткізілімінің  жалпы көлемі  18 миллион  тоннадан асып отыр.