100 бюджеттік жоба цифрлық теңгемен іске асырылады – ҰБ төрағасы

АСТАНА. KAZINFORM – Алдағы уақытта 100 бюджеттік жоба цифрлық теңгемен іске асырылады. Бұл туралы Ұлттық банк төрағасы Тимур Сүлейменов айтты.

- Цифрлық теңге жайлы бірнеше рет айттық. Жалпы, цифрлық теңгені күнделікті қолданыста көретін боламыз. Бірақ, бірінші бағыт – Үкіметтің, мемлекеттің қаражатын жемқорлықсыз, таза, ашық түрде пайдалану. Сол бағытта 270 млрд цифрлық теңге шығардық. Мысалы, Ұлттық қордың қаражаты есебінен іске асқан «Достық-Мойынты», «Талдықорған-Үшарал» жобалары цифрлық теңгемен қаржыландырылды. Цифрлық теңгені қолданудың ең басты бағыты – бұл мемлекеттік қаражатты дұрыс пайдалану, - деді ол Ұлттық банкте өткен брифингте.

Оның атап өтуінше, алдағы уақытта кем дегенде 100 бюджеттік жобаны цифрлық теңгемен қаржыландыруға қатысты Үкіметпен келісім бар.

- Жеке жұмыс тобын құрдық. Ұлттық банк тарапынан мен, ал Үкімет тарапынан Серік Жұманғарин (Премьер-Министрдің орынбасары – Ұлттық экономика министрі) басқарады. 100 жобаны цифрлық теңгемен іске асырамыз, - деді Тимур Сүлейменов.

Бұған дейін Қазақстан қор биржасында цифрлық теңге қолданылуы мүмкін екенін жазған едік.