15 қыркүйекте тұмауға қарсы вакцина егу басталады: Кімдер бірінші екпе алады?

АСТАНА. KAZINFORM – Қоғамдық денсаулық сақтау ұлттық орталығы Инфекциялық аурулардың алдын алу департаментінің директоры Мейірім Сұлтанова тұмауға қарсы вакцина бірінші кезекте кімдерге салынатынын айтты.

— Арнайы бұйрыққа сәйкес вакцина егу бірінші кезекте медицина қызметкерлеріне және созылмалы аурулары бар балаларға жүргізіледі. Одан басқа эпидемиялық көрсеткіштер бойынша да әр адам емханаларда екпе ала алады, - деді ол «Jibek joly» телеарнасындағы «Бүгін LIVE» бағдарламасында.

Сондай-ақ спикер елімізде қандай вакцина салынатынын және оның қанша данасы алынғанын атап өтті. 

— Вакцина егу жұмыстары бүкіл республика бойынша 15 қыркүйекте басталады. Оған дейін жергілікті медициналық ұйымдарға жеткізіледі. Қазіргі таңда 2 млн-нан астам доза сатып алынды. Бұған дейін бірнеше жыл бойы салынып келген «Гриппол плюс» вакцинасы қолданылады, - деді Мейірім Сұлтанова . 

Оның айтуынша, екпе салынған соң адамдарда асқыну болған-болмағанына мониторинг жүргізіліп отырады. 

Еске сала кетсек, Қазақстанның бас мемлекеттік санитар дәрігері Сархат Бейсенова тұмау, ЖРВИ және COVID-19 инфекциясы бойынша 2025-2026 жылдардың эпидемиялық маусымында санитарлық-профилактикалық іс-шаралар жүргізу туралы қаулыға қол қойды. 

Бұған дейін биылдан бастап елімізде балалар мен жасөспірімдерге жаңа екпелер егілетінін жазған едік.