170-тен аса әскери қызметші әскери парадқа қатысу үшін Астанаға келді
АСТАНА. KAZINFORM — Елордалық вокзалда әскери парадтың алғашқы қатысушылары — Ақтау гарнизонының теңіз жаяу әскерлері бригадасының әскери қызметшілерін күтіп алу рәсімі өтті, деп хабарлайды Kazinform тілшісі.
— Екінші Дүниежүзілік соғыстағы жеңістің 80 жылдығына арналған шеруге қатысу үшін «Батыс» өңірлік қолбасшылығынан 173 адамнан құралған 390-теңіз бригадасы келіп жетті. Түскеннен кейін біз уақытша пунктке орналасамыз және шамамен 1,5 ай далалық лагерьде жаттығамыз, — деді взвод сержанты Виталий Фролов.
Айта кетейік, биыл Жеңістің 80 жылдығына және Отан қорғаушылар күніне арналған әскери шеру 7 мамырда өтеді. Қазақстанда мұндай шерулер 2020 жылдан бері өткізілмеген.
— Жеңіс күніне арналған шеруге дайындық жұмыстары бекітілген жоспарға сәйкес жүргізіледі. Биыл шеруге Қарулы күштер мен басқа да әскери құрылымдардан 4 мыңға жуық әскери қызметші қатысады, олардың 200-ден астамы — әйелдер. Сонымен қатар, шеруге 200-ге жуық әскери және авиациялық техника тартылады, — деп хабарлады Қорғаныс министрлігі.
Іс-шара Екінші Дүниежүзілік соғыстағы жеңістің 80 жылдығын мерекелеу аясындағы басты оқиғалардың бірі болады.
Осылайша қазақстандықтардың бұл оқиға туралы естелігін, туған жерді қорғаудың маңыздылығын және Қазақстан халқы дәстүрлерінің сабақтастығын атап көрсетеді.
Бұған дейін Астана халықаралық әуежайы жолаушыларға Жеңістің 80 жылдығына, сондай-ақ Отан қорғаушылар күніне орай өтетін әскери шеруге дайындық және оны өткізу кезінде ұшу кестесінде өзгерістер болуы мүмкін екенін хабарлады.
