2010 жылы мемлекеттік бюджетке 4 388,8 млрд. теңге түсті - Б. Жәмішев
АСТАНА. 2 ақпан. ҚазАқпарат /Руслан Ғаббасов/ - 2010 жылы мемлекеттік бюджетке 4 388,8 млрд. теңге құйылды.
Бұл жоспардың 105,7 пайызын құрады. Осы жайында бүгін Үкімет басшысы Кәрім Мәсімовтің қатысуымен өткен Қаржы министрлігінің алқа мәжілісінде аталған ведомствоның басшысы Болат Жәмішев мәлім етті.
«Бұл ретте республикалық бюджетке 3 729,2 млрд. теңге түсті. Атап айтқанда жоспар 106 пайызға орындалды»,-деді министр.
Ведомство басшысының сөзіне қарағанда, мемлекеттік бюджеттің шығыстары 4 934,1 млрд. теңгені құрады немесе 98,3 пайызға атқарылды. Ал республикалық бюджет шығыстары 4 284 млрд. теңгеге немесе 99,1 пайызға орындалды. Игерілмей қалған қаржы көлемі 37,5 млрд теңгеге жетті. Бұл көрсеткіш 2009 жылмен салыстырғанда 22, 6 млрд. теңгеге төмен. «Оның ішінде 14 млрд. теңге мемлекеттік сатып алулар нәтижелері бойынша үнемдеу және бөлінетін бюджеттік бағдарламалар тұрғысындағы қаражаттың бөлінбеген қалдығы есебінен қалыптасты»,-деді Б. Жәмішев.
