2018 жылы Беларусь елінде Қазақстан мәдени күндері өтеді

АСТАНА. ҚазАқпарат - 2018 жылы Беларуста Қазақстан мәдени күндері өтеді, деп хабарлайды БЕЛТА.

Бұл туралы Беларусь Мәдениет министрлігі мәдениет және талдау жұмыстары бас басқармасының бастығы Василий Черник  «Қазақстан-Беларусь: дипломатиялық қарым-қатынастарының орнағанына 25 жыл. Қорытындылары, нақты нәтиже мен болашақ»  атты халықаралық конференциясында айтты.

«Мұндай іс-шаралар тұрақты түрде өткізіледі. 2014 жылы Астанада Беларусь мәдени күндері өтті. 2018 жылы Беларуста Қазақстан мәдени күндерін өткізу жоспарлануда», - деп атап өтті Василий Черник.

Беларусь пен Қазақстан арасындағы мәдени қарым-қатынас 1996 жылы 17 қаңтарда қабылданған мәдениет, білім және ғылым салаларындағы ынтымақтастық туралы үкіметаралық келісімге және мәдениет және өнер салаларындағы ынтымақтастық туралы ведомствоаралық келісімге сәйкес дамуда.