2025 жылы Алматы облысында 400 шақырымнан астам республикалық автожол жөнделеді
ҚОНАЕВ.KAZINFORM - Алматы облысында келесі жылы республикалық, облыстық және жергілікті маңызы бар бірқатар жолдарға жөндеу жұмыстарын жүргізу жоспарланған. Kazinform тілшісі биыл жөнделген және 2025 жылы жөнделетін жолдарға шолу жасады.
«ҚазАвтоЖол» ҰК» мәліметіне сәйкес, биыл Алматы облысы бойынша ұзындығы 123 шақырым болатын республикалық маңызы бар автомобиль жолдарына жөндеу жұмыстары жүргізілген. Оның ішінде 87 шақырым реконструкциялау жұмыстарымен, 36 шақырым орташа жөндеу жұмыстарымен қамтылған. Бұл жұмыстарға жалпы - 15,7 млрд теңге жұмсалды. Ал келесі жылы 441 шақырым жол жөнделмек.
- 2025 жылы ұзындығы 441 шақырым автожолдарды жөндеу жоспарланған, оның 247 шақырымына орташа жөндеу жүргізіледі. Жол учаскелерін жөндеуге 30 млрд теңге бөлу жоспарланып отыр, - деді «ҚазАвтоЖол» ҰК» АҚ Басқарма
төрағасының орынбасары Сырым Хамзин.
Ал Алматы облысының жолаушы көлігі және автомобиль жолдары басқармасының мәліметіне сәйкес, облыстың 9 ауданы және 2 қаласының автомобиль жолдарының 308,4 шақырымына ағымдағы жөндеу және орташа жөндеу жұмыстары жүргізілген және 253,4 шақырымына жұмыстар әлі де жүргізіліп жатыр. Оның ішінде:
1. Балқаш ауданы – аяқталғаны 2,3 км, жалғасуда – 2,6 км;
2. Жамбыл ауданы – аяқталғаны 28 км, жалғасуда – 9,7 км;
3. Еңбекшіқазақ ауданы – аяқталғаны 70 км; жалғасуда – 46,9 км;
4. Іле ауданы аяқталғаны 33,7 км, жалғасуда – 32,06 км;
5. Талғар ауданы – аяқталғаны 37,8 км, жалғасуда – 31,2 км;
6. Қарасай ауданы – аяқталғаны 52 км, жалғасуда – 19,2 км;
7. Кеген ауданы – аяқталғаны 23,4 км, жалғасуда – 76,5 км;
8. Райымбек ауданы – аяқталғаны 24,4 км, жалғасуда – 4 км;
9. Ұйғыр ауданы – аяқталғаны 21,2 км, жалғасуда – 9,4 км;
10. Алатау қаласы – аяқталғаны 6,3 км, жалғасуда –13,3 км;
11. Қонаев қаласы – аяқталғаны 5,7 км, жалғасуда – 8,5 км.
Айта кеткен жөн, Алматы облысының әкімшілік орталығы Қонаев қаласында биыл 22 көшеге шұңқырларды жабу жұмыстары жүргізілсе, ал 21 мың м² жуық 9 көшеде ағымдағы жөндеу жұмыстары болды.
- 2025 жылға облыстық маңызы бар автомобиль жолдарын салу, жөндеу және қайта құру бойынша 279,9 шақырым жұмыс жүргізу жоспарланған. Бүгінгі күні облыстық бюджеттік комиссия қарауына бюджеттік өтінім жолданды. Осы жылдың желтоқсан айының екінші жартысында мәслихат шешімі негізінде бюджет қаражаты бөлінген жобалар бойынша 2025 жылы жұмыстар жүргізілетін болады, - деп хабарлады басқармадан.
Сондай-ақ облыс бойынша шамадан тыс жүк тасымалдайтын көліктер жол төсеміне зиян келтірмеуі үшін жергілікті автомобиль жолдарына 2 автоматтандырылған өлшеу станциялары орнатылған. Алдағы уақытта тағы үшеуі қойылмақ.
Еске салайық, бұған дейін Алматы облысында бірнеше автожол көктемге дейін жабылғанын жазғанбыз.
