2026 жылы Арыстағы қару-жарақ қоймасы Ақтөбе маңына көшірілмек
АСТАНА. KAZINFORM — Арыста қару-жарақ қоймасында болған жарылыстың зардабын жою жұмыстары аяқталды. Бұл туралы Қорғаныс министрінің орынбасары Шайх-Хасан Жазықбаев мәлім етті.
Мәжілістің жалпы отырысынан кейін БАҚ өкілдері Қорғаныс министрінің орынбасарына «Арыс қаласындағы қару-жарақ қоймасын көшіру қашан толық аяқталады?Ақтөбе, Қарағанды облысында қару-жарақ қоймасын салу жоспары туралы айтылды, қалай жүріп жатыр? деген сауал қойылды.
— Жыл сайын Арыстағы жарылыс салдарын залалсыздандыру жұмыстары жүргізіліп жатыр. Бүгінде ең қауіпті деген жарылыс зардаптары жойылды. 2026 жылдың соңында Ақтөбе маңына көшіру жоспарда бар. Қазір Арыс қаласының тұрғындары ешқандай жарылыссыз, тыныш өмір сүріп жатыр, қауіп жоқ, — деп қысқа қайырды Шайх-Хасан Жазықбаев.
Министр орынбасарының айтуынша, барлығы қаражаттың бөлінуіне байланысты.
Еске сала кетсек, 2019 жылы 24 маусымда Түркістан облысының Арыс қаласындағы әскери бөлім қоймасында жарылыс болды. Салдарынан үш адам қаза тапты — Арыс тұрғыны мен екі әскери қызметші. Одан бөлек 170-ке жуық адам зардап шекті. 20-ға жуық үй, 9 қора-қопсы жанып, далалы аумақта 14 ошақ тұтанды. Үй-жайлар мен ғимараттардың 80-90 пайызына әртүрлі деңгейде зақым келді.
