2027 жылдан бастап жедел жәрдем қызметі бойынша жаңа норма енгізіледі – министр

АСТАНА. KAZINFORM – Жедел жәрдем қызметінің жаңа нормасы халықаралық тәжірибеге сәйкес. Бұл туралы Денсаулық сақтау министрі Ақмарал Әлназарова мәлім етті.

- Бүгінде жедел жәрдем қызметі 8 миллионнан астам шақырту алады. Оның ішінде 60 пайызға жуығы төртінші санатқа жатады, яғни созылмалы ауруы бар немесе өз аяғымен емханаға бара алатын науқастар, осы орайда шұғыл, адам өміріне қауіп төнген жағдайдағы шақыртуларға жедел жәрдем кешігіп жатады. Сондықтан біз халықаралық барлық тәжірибені ескере отырып, заң жобасына тиісті ұсынысты енгізіп отырмыз, - деді Ақмарал Әлназарова Мәжілісте МӘМС жүйесі туралы заң жобасын таныстыра тұрып.

Сондай-ақ ведомство басшысы жедел жәрдем қандай жағдайда көрсетілетініне қатысты тізім жасалғанын жеткізді.

- Бұл норма 2027 жылдан бастап іске қосылады, - деп қысқа қайырды министр.

Еске сала кетейік, егер 103 жауап бермесе, жедел жәрдемге хабарласудың балама нұсқасы бар.

Айта кетейік, бүгін Мәжілісте «Міндетті әлеуметтік медициналық сақтандыру мәселелері бойынша өзгерістер мен толықтырулар енгізу туралы» заң жобасының таныстырылымы өтіп жатыр.