24 өзбек азаматының төлқұжаттарына соғылған мөр жалған болып шықты
АСТАНА. ҚазАқпарат - «Сарыағаш» шекара отрядының «Сарыағаш теміржол» бақылау бөлімшесінде (қазақ-өзбек шекарасы) кеше түс кезінде шекарашылар «Алматы - Нөкіс» бағытымен кетіп бара жатқан №322 жолаушылар пойызынан ең егдесі елу жетідегі, ең кішісі он тоғыздағы 24 Өзбекстан азаматын түсіріп, алып қалды.
Бұл азаматтар мен азаматшалардың ұсталу себебі - барлығының төлқұжаттарына соғылған Алматы қаласы бойынша миграциялық полиция бөлімінің 2016 жылдың 10 қаңтарына дейін біздің елде жүруге рұқсат беретін қолдан жасалған № 1705 мөрі. Ұсталғандармен ҚР Қылмыс кодексінің 385 бабының 3 бөлігі бойынша Оңтүстік Қазақстан облысы, Сарыағаш аудандық ішкі істер басқармасы айналысатын болады, деп хабарлайды ҚР ҰҚК ШҚ баспасөз қызметі.
