28 ақпанда Қазақстан жеріне ғарышкерлері бар «Союз» капсуласы қонады
АСТАНА. ҚазАқпарат - 2018 жылдың 28 ақпаны күні «Союз МС-06» көліктік басқарылатын кемесінің түсуші аппараты Қазақстан жеріне келіп қонады, деп хабарлайды ҚазАқпарат тілшісі.
Жарты жылға жуық уақытқа созылған ғарыштық вахтадан кейін МКС-53/54 экспедициясының мүшелері - ресейлік ғарышкер Александр Мисуркин, америкалық астронавтар Джозеф Акаба мен Марк Ванде Хай Жерге оралады.
Роскосмостың баспасөз қызметінің мәліметінше, аппарат 28 ақпан күні жергілікті уақыт бойынша таңертеңгі 8.31-де Жезқазған қаласының маңына, далалы жерге қонатын болады.
Жерге түсуші аппараттың қонуы мен космонавтарды эвакуациялау сәтін online.roscosmos.ru сайтынан немесе Роскосмостың ВКонтакте әлеуметтік желісіндегі ресми парақшасынан тікелей көруге болады.
