30 жастағы адам «жастар» санатына кіруі керек пе?

АСТАНА. ҚазАқпарат - Жастар санатына 14 пен 30 жас аралығындағылар кіруі тиіс. М.Х. Дулати атындағы Тараз мемлекеттік университетінің ректоры Махметғали Сарыбеков ҚР Президенті жанындағы Орталық коммуникациялар қызметіндегі баспасөз мәслихатында осындай пікір айтты.

«Қазіргі пайдаланып жүрген заңда "жастар" ұғымында 14-тен 29 жасқа дейінгілер қамтылады. Мен Білім және ғылым министрінің орынбасары қызметін атқарған кезде, біз шетелдік тәжірибені зерттеп, тиісті сараптамалардан кейін заң жобасына тағы 1 жас қосқан едік. Яғни, онда «жастар» санаты 14-тен 30 жасқа дейінгі аралықты қамтиды. Бірақ, заң жобасы әлі қабылданған жоқ. Ол министрлік тарапынан Парламент қарауына енгізілді және осы тұрғыда әртүрлі ойлар мен пікірлер айтылады»,- деп тоқталды ректор. «Менің ойымша, жастар ұғымы он төрт пен отызға дейінгі аралықты қамтуы керек. Себебі, ол әлемдік тәжірибеге негізделген», - деп түйді М. Сарыбеков.