600-ге жуық қазақстандық әскери қызметші шетелде білім алып жатыр - ҚМ
АСТАНА. KAZINFORM – 600-ге жуық қазақстандық әскери қызметші шетелде білім алып жатыр. Бұл туралы Қорғаныс министрлігі Әскери білім және ғылым департаментінің бастығы, полковник Мұрат Олжабаев айтты.
- Бүгінгі таңда 50-ден астам шетелдік жоғары оқу орындары мен оқу орталықтарында 600-ге жуық қазақстандық әскери қызметші оқиды. Оқуға жіберу Қарулы Күштердің қажеттілігіне сәйкес, негізінен Қазақстан Республикасының әскери оқу орындарында даярлау жүзеге асырылмайтын мамандықтар бойынша жүргізіледі, - деді ол Орталық коммуникациялар қызметіндегі брифингте.
Оның атап өтуінше, әскер қызметшілерді шетелде оқыту жауынгерлік іс-қимылдарды жүргізудің жаңа тәсілдері мен әдістерімен, сондай-ақ қорғаныс пен қауіпсіздік саласындағы халықаралық стандарттармен танысуға мүмкіндік береді.
- Басқа елдердің өкілдерімен бірлесіп оқыту Қазақстанның ҰҚШҰ, НАТО, Қытай сияқты әріптес мемлекеттермен, сондай-ақ көрші Орталық Азия елдерімен дипломатиялық және әскери байланысын нығайтады. Бұл бірлескен операциялар немесе бітімгершілік миссиялар жағдайында өзара түсіністік пен үйлестіруді дамыту үшін маңызды, - дедің Мұрат Олжабаев.
Айта кетейік, бүгін сенаторлар «Қазақстан Республикасының кейбір заңнамалық актілеріне резервтегі әскери қызмет және жекелеген орталық мемлекеттік органдардың функцияларын қайта бөлу мәселелері бойынша өзгерістер мен толықтырулар енгізу» туралы заңды бірінші оқылымда қарады.
