7 мыңнан аса қазақстандық жүргізуші куәлігін екі батырманы басу арқылы ауыстырды

АСТАНА. KAZINFORM — Электрондық үкімет сервистері қазақстандықтардың күнделікті өмірінің ажырамас бөлігіне айналды. Бұл туралы ҚР цифрлық даму, инновациялар және аэроғарыш өнеркәсібі министрі Жаслан Мәдиев баяндады.

— Бүгінде мемлекеттік қызметтердің 92%-ы онлайн форматта қолжетімді, ал смартфондандыру деңгейі 90%-ға жетті. 2024 жылы 341 миллион қызмет көрсетілді, оның 91%-ы электронды түрде ұсынылды. Қызметтердің басым бөлігі проактивті түрде өтінішсіз көрсетіліп жатыр, Халыққа қызмет көрсету орталығына бармай-ақ жүзеге асады, — деді министр Үкіметтің бүгінгі отырысында.

Сала министрі eGov арқылы онлайн қызмет көрсетуге монополияны жойып, негізгі қызметтерді танымал финтех платформаларға шығарғанын да еске салды. Бұл халықтың цифрлық сервистерге қолжетімділігін арттырды.

— Қазақстандықтар QR-қолтаңба мен биометриялық сәйкестендіру технологияларын меңгеріп, күнделікті қолданып жүр. Цифрлық құжаттар сервисі ерекше танымал болды — бір жылда 292 миллион рет қолданылды. eGov Mobile қосымшасы жай ғана портал емес, азаматтардың күнделікті өміріндегі нағыз цифрлық көмекшісі болды. Тек өткен жылы қазақстандықтарға құжаттың жарамдылық мерзімі, мектепке қабылдау, жәрдемақы тағайындау, грант беру, туған күн және үйлену тойы туралы құттықтауларға дейін 36 миллион хабарлама жіберілді. Өткен жылы «Ұлттық қор — балаларға», «Стоп-кредит», 4 «Көлік иелену тарихы», «Құмар ойындарға қатысудан ерікті түрде бас тарту» секілді танымал сервистер іске қосылды. Мысалы, қазір жүргізуші куәлігін екі батырманы басу арқылы ауыстыруға болады — бұл сервисті 7 мыңнан астам қазақстандықтар пайдаланды, — деп толықтырды Ж. Мәдиев.

Еске сала кетейік, Астана мен Алматы әуежайынан биометриялық сәйкестендіру арқылы ұшуға болады.