9-Мамыр - Жеңіс күні Астанадағы «Қазақ елі» монументінен «Отан қорғаушылар» ескерткішіне дейін азаматтық шеру өтеді - әкімдік
АСТАНА. Мамырдың 4-і. ҚазАқпарат /Гүлмира Әлиакпарова/ - Астана қаласының әкімдігі 9-Мамыр - Жеңіс күні «Қазақ елі» монументінен бастап «Отан қорғаушылар» ескерткішіне дейін азаматтық шеру өтетінін хабарлап, қатысушыларды «Георгий лентасын» бір адамдай тағуға шақырды.
Бүгінде «Георгий лентасы» Даңқ Ордені иегерлерінің ерекше белгісі ғана емес, кеңес халқының 1941-1945 жылдардағы соғыстағы Ұлы Жеңісінің нышаны іспетті.
Жеңістің 65 жылдығын мерекелеу қарсаңында сарғылт-қара түсті жібек қиындысын Астана қаласының тұрғындары мен қонақтары да ала алады. «Георгий лентасы» мен естелік белгілер, мамырдың 9-ы күні теңертеңгі сағат 9.00-де «Қазақ елі» монументінен бастау алып, «Отан қорғаушылар» ескерткішінің Мәңгілік алауына дейін өтетін шерудің барысында таратылатын болады.
Сондай-ақ, «Георгий ленталары» мамырдың 8-і күні Астана қаласы әкімдігі ғимаратының алдындағы алаңда (Абай және Бейбітшілік көшелерінің қиылысы) да таратылмақ. Елорда әкімдігі бұл игі шараға қатысуға еріктілерді шақырып отыр. Оларға сондай-ақ, азаматтық шерудің шарттарын ақпараттандыру мәселесі де сеніп тапсырылатын болады.
Еске сала кетейік, «Георгий лентасын» тарату дәстүрі Жеңістің 60 жылдығы қарсаңында ресейлік «РИА-жаңалықтар» ақпараттық агенттігінің және студенттер қозғалысының бастамасымен басталған болатын.
