«91» тобының продюсері Qazaqstan арнасындағы жаңа реалити-шоуға жетекшілік етеді
АСТАНА. ҚазАқпарат - Атышулы «91» тобының продюсері Ерболат Беделхан «Qazaqstan» ұлттық телеарнасында жаңа реалити-шоуды бастағалы отыр, деп хабарлайды «ҚазАқпарат» ХАА тілшісі.
«Біздің жас аудиторияға дайындап отырған арнайы сыйымыз бар. Өздеріңіз білетіндей, соңғы жылдары елімізде қазіргі заманғы қазақ музыкасының түрлі бағыттары кең дамуда. Соның бірі - q-pop бағыты. Осы бағыт бойынша біз арнайы дайындаған жобамыз бар», - деді «Қазақстан» РТРК» АҚ Басқарма төрағасы Ерлан Қарин «Қазмедиада» өткен баспасөз мәслихатында.
Оның айтуынша, реалити шоуға белгілі продюсер, музыкант Ерболат Беделхан жетекшілік етеді.
«Ерболат Беделханның жетекшілігімен қыздар арасындағы q-pop бағыты бойынша орындаушыларды іріктеуге бағытталған реалити-шоу эфирге енетін болады», - деді ол.
Жастарға арналған жаңа реалити-шоу «Q-pop Idols» деп аталмақ.
